علاش بوريطة ما يْحْتَجْ على مصر؟ ممثلين من البوليساريو لي عمّرها ما دارت انتخابات شاركو فمراقبة الانتخابات الرئاسية فمصر…
الصحراء اليومية/العيون
علنات البوليساريو على مشاركة وفد ديالها ضمن وفد تابع لمفوضية الاتحاد الإفريقي لي شارك فمراقبة الانتخابات الرئاسية المصرية لي دازت فالفترة من 10 إلى 12 دجنبر الجاري وغادي يتعلن على نتائجعا نهار 18 من نفس الشهر.
وفد البوليساريو شارك ضمن وفد هاد المفوضية وهي أيضا نفس الحالة ديال استقبال زعيم البوليساريو فتونس لي جات فإطار القمة اليابانية الأفريقية للتنمية، ولي بموجبو تم استدعاء سفيرنا فتونس للتشاور، وكاينين حالات بزاف أخرى خرجات فيها الخارجية ودافعات على الوحدة الترابية للمملكة.
مصر مرة مرة كتبين لينا أن مواقفها ما واضحاش من نزاع الصحرا، ووزارة الشؤون الخارجية والتعاون الأفريقي والمغاربة المقيمين في الخارج ساكتة بدون ما دير أية رد فعل باش توقف بحال هاد المهازل ديال نظام السيسي.
وحتى هاد مفوضية الاتحاد الإفريقي خاص يتخاد منها موقف، دابا باش نافعين مراقبين ديال البوليساريو فالإنتخابات الرئاسية المصرية، واش مخيمات تندوف عمّرها دارت شي انتخابات أو دارت البوليساريو شي انتخابات، السلطة عندهم كتمشي من واحد لواحد كيعينو نظام العسكر فالجزائر.
