وُقْتَاشْ غادِي إِدَّخَّلْ والي لعيون باشْ إِفَكْ لبلوكاجْ لِّي كَيْعِيشُو فريق شباب المسيرة لكرة القدم وُلْبَارْحْ كابرانات العسْكَرْ كَوْنُو فريق من البوليساريو وُ كَيْحَاوْلُو دابا باش إِدَخْلُوهْ لْـ “كافْ”..

الصحراء اليومية/العيون

سْمَعْنَا لْبَارْحْ بأن الجزائر عَلْنَاتْ عنْ تأسيس اتحادية الصحراء الغربية لكرة القدم وُ كَوْناتْ فريق من البوليساريو وُ كَتْحَاوْلْ دابا باش دَّخْلُو لْـ “كافْ” ولكنْ هاذْ الشي راهْ مَنْ سابِعْ المُستحيلات وُ مَعَمْرُو غادِي إِكُونْ خُصُوصاً وُ حْنَا كَنْعَرْفُو بأنَّ كابرانات الجزائر عَنْدْهُمْ نَصْ عْقَلْ.
ولكن لِّي كَيْهَمْنَا حْنَا هو فريق شباب المسيرة لكرة القدم، حْتَّى حْنَا كصحراويين مغاربة بْغِينا نْشُوفُو هاذْ الفريق إِلْعَبْ أدْوارْ طلائعية..بْغِينا نشوفوهْ فالقسم الوطني الأول..بْغِينا نْشُوفُوهْ إلعَبْ كأسْ العرش كممثل للأقاليم الصحراوية..بْغِينَا نشوفوهْ إتنافْسْ عْلَى كأْسْ الكؤوس القارية وُإِسْتَقْبَلْ هْنَا فلعيون فُرُقْ كْبَارْ بْحالْ الوداد، الرجاء، الجيش وُ زِيدْ وُ زِيدْ..
فريق شباب المسيرة راهْ مَاشِي مَزْيانْ هاذْ الموسم، بَيْنُو وُبيْنْ المتصدر للبطولة نقطة وَحْدَة، وُ الكرة دابا عَنْدْ والي لعيون “عبدالسلام بيكرات” لِّي حَدْ الساعة باقي شَادْ الظَّلْ، مدارْ حْتَّى شِي تدخُّلْ، الفريق كيْعِيشْ مشاكل وُ بْلُوكاجْ وُ دعاوي قضائية، وُحْنَا كصحافيين مَبْقِينَا عارْفِينْ حْتّى شِي حاجة، وُلِّينَا بْحالْ ذاكْ الأطرش فالزَّفَّة كِيمَا كَيْقُولو خُّوتْنَا المصريين، مَبْقِينَاشْ عارْفِينْ شْكونْ لِّي كَيْسَيَّرْ وُشْكونْ لِّي كَيْوَقَّعْ لِيدِيسِّيزْيونْ وُ شكونْ هُما المنخرطين، قربالة نايْضَة وُكَثْرَاتْ الهضْرَة ولكْلاَمْ، مَكايْنْ غِيرْ شَدْ لِيَّا نَقْطَعْ لِيكْ..المشكل هو أننا صْبَحْنَا خايْفِينْ ياكْ هاذْ الشِّي لِّي واقْعْ مَيْأثَّرْشْ عْلَى اللاعبين خصوصا وأن الفريق قاضِي غَرَاضْ هاذْ لِيَّامْ، انتصارات متتالية..
المهم الجزائر راهَا خَدَّامَا باشْ تْكَوَّنْ فريق من البوليساريو لكرة القدم، وُحْنَا عِوَضْ باشْ نَتَّاحْدُو كمسؤولين ترابيين و منتخبين و جمهور و فعاليين و غيورين رياضيين مَنْ أجْلْ الدَّفْعْ بْهَاذْ الفريق إلى الأمام و احتلال المراتب المتقدمة و المشرفة، باقِي شَاطْرينْ غِيرْ فْشَدْ لِيَّا نَقْطَعْ لِيكْ، وخْوِينَا التيران وُعْطِينَا الفرصة للكابرانات و البوليساريو باشْ إفَكْرُو إكَوْنُو فريق صحراوي لكرة القدم..
الكرة دابا عنْدْ والي لعيون وُخَصُّو منْ صْبَاحْ إدَّخَّلْ باشْ إِحَيَّدْ هاذْ لبلوكاجْ لّي كَيْعِيشُو الفريق وُ بيهْ نْصَدْمُو الجزائر وُرْبَاعْتْهُمْ قْبَلْ مَنْتْفَاجْئُو شِي نْهَارْ وِكُونْ ذِيكْ الساعة فاتْ الفُوتْ.