تأجيل زيارة ألباريس للجزائر.. الصبليون بَاغْيَا تعْقَدْ لقاء بين ألباريس وتبون ..والعسكر كيشوفوه حگرة..

الصحراء اليومية/العيون

تأجلات رسميا الزيارة اللي كان غادي يدير وزير الشؤون الخارجية الإسبانية، خوسيه مانويل ألباريس، للجزائر، واللي كانت غادي تكون الأولى من نوعها بعد حالة النفور الدبلوماسي بين الجزائر ومدريد بسباب موقف الأخيرة ودعمها لمبادرة الحكم الذاتي فمارس 2022.

تأجيل الزيارة الرسمية ديال وزير الشؤون الخارجية، خوسيه مانويل ألباريس، للجزائر برراتو وسائل إعلام جزائرية وإسبانية بالأجندة ديال الزيارة ووجود خلافات بين الجانبين حول فحوى هاد الأجندة وشكون غادي يتلاقى خوسيه مانويل ألباريس.

التقارير الإخبارية فالبلدين اللي تناولو مسألة التأجيل ديال الزيارة قالوا أن محور الخلاف اللي كاين دابا هو مسألة استقبال الرئيس الجزائري، عبد المجيد تبون لوزير الخارجية الإسبانية، بحيث أن الجانب الإسباني معول على هاد اللقاء فالوقت اللي نظام العسكر رافضو وباغي يختاصر الزيارة فلقاء بين خوسيه مانويل ألباريس ووزير الخارجية الجزائرية، أحمد عطاف.

هاد الاقتراح ديال اللقاء بين خوسيه مانويل ألباريس والرئيس الجزائري، عبد المجيد تبون، كيشوفوه الصبليون عادي بحكم أن تبون سبق ليه استقبل فالأيام الماضية وزراء خارجية بحال ديال موريتانيا والكونغو، فالوقت اللي كيشوف نظام العسكر فاللقاء بين الرئيس ووزير الخارجية الإسباني استنقاص من الجزائر، خاصة مع أزمة العلاقات بين البلدين وكونها السباقة لإعادة العلاقات مع الصبليون، وأنه ممكن يكون ولكن ماشي مباشرة فأول زيارة لألباريس للجزائر ما بعد التوتر اللي كان.

جدير بالذكر أن الجانبين ما علنوش على الموعد الجديد ديال الزيارة أو أُفق تنظيمها، الشي اللي كيخلق حالة من الشك بيناتهم فعودة المياه إلى مجاريها على الأقل على المستوى السياسي.