واحد من أكبر أعيان قبيلة الرگيبات مدفون فالسمارة… موريتانيا سمَّاتْ بوابة معْبَرْها مع الجزائر بَسْمِيتُو..

الصحراء اليومية/العيون

بتوجيه من رئيس موريتانيا محمد ولد الشيخ الغزواني، فإن وزارة الداخلية واللامركزية تبلغ الجهات المعنية بأنها اتخذت كافة الاجراءات الللازمة، لفتح المعبر الحدودي “الشهيد المجاهد اسماعيل ولد الباردي” بتاريخ الجمعة 23 فبراير 2024، بهدف تسهيل انسيابية عبور الأشخاص والبضائع من و إلى الجزائر.

السمية لِّي طلقاتها موريتانيا على المعبر عندها بزاف ديال الدلالات وتحيلنا على التاريخ المشترك لدول شمال المغرب، لاسيما المغرب وموريتانيا والجزائر، واللي كنتقاسموه معاهم بحال تقاسمنا معاهم اللغة والدم والتقاليد والأعراف وبزاف ديال الحوايج آخرين.

موريتانيا خاصة عندها إرتباط وثيق بالأقاليم الجنوبية للمملكة وهوية وحدة ديال “البيظان” الشي لِّي كيخلي عائلات من قبائل الصحرا مازال فموريتانيا وكنا شفنا الاسبوع الماضي ديال الموسم ديال قبيلة الرگيبات فموريتانيا.

الإسم اللي عطاتو موريتانيا للجهة ديالها من المعبر عندو أهمية كبيرة ويعود للمجاهد من قبيلة “الرگيبات أولاد موسى” والمعروف بمعاركه ضد المستعمر الفرنسي بالمنطقة سواء فالمغرب أو الجزائر أو موريتانيا، وعاش فالفترة مابين سنة 1883 وتوفى سنة 1972.

كاين بزاف ديال الاقاويل حول مكان دفن ٱسماعيل ولد الباردي، بحيث تشير مصادر قبيلة لـ “گود” لكونه دفين مقبرة الشهداء نواحي مدينة السمارة، بينما كيقولو الموريتانيين انه مدفون عندهم فمنطقة بئر أم گرين.

المقاوم إسماعيل ولد الباردي هو واحد من رموز الصحرا وخلى تاريخ كبير فمواجهة المستعمر الفرنسي اللي خاض ضدو عشرات المعارك سواء في المغرب أو موريتانيا أو الجزائر فاش ما كانتش كاينة حدود ولا خرائط، وديجا كان محكوم عند الفرنسيين بالإعدام ومطلوب عندهم، وإلى يومنا هذا مازال أحفادو مقسمين بين مدينة العيون ومدينة السمارة.

• متابعة.