لَجْنَةْ العَدْلْ فْإِسْبَانْيَا تُوَافِقْ عَلَى مَنْحْ الجِنْسِيَّةْ لِلصَّحْرَاوِيِّينْ لِّي تْزَادُو قْبَلْ 1976..

الصحراء اليومية/العيون

وَافْقَاتْ لَجْنَة العَدْل فْمَجْلِسْ النُّوَّابْ الإِسْبَانِيْ، نْهَارْ لَخْمِيسْ، عْلَى مُقْتَرَحْ قَانُونْ كَيْهْدَفْ مَنْحْ الجِنْسِيَّة الإِسْبَانِيَّة لِلصَّحْرَاوِيِّينْ المَوْلُودِينْ قْبَلْ فَبْرَايِرْ 1976، يَعْنِي قْبَلْ تَارِيخْ انْتِهَاءْ الإِدَارَةْ الإِسْبَانِيَّةْ لِلصَّحْرَاء.

تْقَدَّمْ بْهَادْ المُقْتَرَحْ فَشْهَرْ نُونْبِرْ 2023 ائتلاف اليَسَار “سُومَارْ”، وُحْصَلْ عْلَى 19 صَوْتْ مُقَابِلْ 3 أَصْوَاتْ رَافْضَةْ وَ 15 امْتِنَاعْ عَنْ التَّصْوِيتْ*.

كَانُو مِنْ أَبْرَزْ الدَّاعِمِينْ لِلْمَقْتَرَحْ نُوَّابْ حِزْبْ العُمَّالْ الاِشْتِرَاكِيْ الإِسْبَانِي (PSOE)، لِّي كَيْتْرَأّْسُو رَئِيسْ الحُكُومَةْ بِيدْرُو سَانْشِيزْ.

وُتَبْعُوهُمْ تَانِي أَحْزَابْ قَوْمِيَّة مِنْ إِقْلِيمْ البَاسْكْ وَكَاتَالُونْيَا، بْحَالْ الحِزْبْ القَوْمِيْ البَاسْكِيْ (PNV)* وُ الحِزْبْ الجُمْهُورِي الكَاتَالُونِي.

فَالمُقَابِلْ، اخْتَارْ *الحِزْبْ الشَّعْبِيْ (PP)* وَحِزْبْ *”جُونْتْسْ”* الاِمْتِنَاعْ عَنْ التَّصْوِيتْ، بَيْنَمَا كَانْ حِزْبْ “فُوكْسْ” هُوَ الوَحِيدْ لِّي عَارْضْ المُقْتَرَحْ دَاخِلْ اللَّجْنَةْ.

بَعْدْ المُوَافَقَة دْيَالْ اللَّجْنَة، غَادِي يْتْحَوَّلْ المُقْتَرَحْ لِـ الجَلْسَة العَامَّةْ فَالغُرْفَةْ السُّفْلَى. 

المُتَوَقَّعْ أَنَّ التَّصْوِيتْ النِّهَائِي يْتْدَارْ فَشْهَرْ شُتَنْبِرْ. 

وِلاَ تْصَادَقْ عَلِيهْ نِهَائِيًّا، غَادِي يْتْنْشَرْ فَـالجَرِيدَة الرَّسْمِيَّة لِلدَّوْلَة، وُمْنْ تَمَّا يَبْدَا التَّطْبِيقْ دْيَالُو.

كَيْجِي هَادْ التَّصْوِيتْ فْوَقْتْ حَسَّاسْ، حَيْتْ مِلَفْ الصَّحْرَاءْ مُقْبِلْ عْلَى مَرْحَلَة دِيبْلُومَاسِيَّة جْدِيدَة. 

المُتَوَقَّعْ أَنَّ شَهْرْ شُتَنْبِرْ وَأُكْتُوبَرْ غادِي يْشْهْدُو مُنَاقَشَاتْ مُهِمَّة دَاخِلْ الجَمْعِيَّةْ العَامَّة لِلأُمَمْ المُتَّحِدَة وَفِي مَجْلِسْ الأَمْنْ حَوْلْ آخِرْ التَّطَوُّرَاتْ المُرْتَبِطَة بِالقَضِيَّة.