الصحراء اليومية/العيون
وقعو البارح الجمعة جوج إنفجارات فمنطقة “أغيلاس” جنوب أوسرد، ولي واضح هو أن هاد العمل الإرهابي المسؤول عليها هو جبهة البوليساريو.
باش نفهمو شنو واقع خاص نعرفو المنطقة اولا، بلدة أوسرد هي منطقة مترامية ومفرقة، فيها البلدة لي كيسكنو فيها المدنيين، ومنطقة أخرى ديال القشلة القديمة ديال العسكر وفيها مجمع كيدخلو ليه المدنيين فيها جامع وسوق وغيرو وفيها أيضا العسكر يعني منطقة مختلطة، بالإضافة لمنطقة أخرى فيها بعثة الأمم المتحدة “مينورسو، وهاد المناطق بثلاثتهم ما وقع فيهم والو.
جنوب بلدة أوسرد كاينة المنطقة لي وقعو فيها جوج إنفجارات وسميتها “أغيلاس” وتبعد على بلدة أوسرد تقريبا بمسافة مابين 3 كيلومتر حتى لخمسة كيلومتر، وهي منطقة كيتواجد فيها العسكر من خلال مجموعة مفرقة ديال البوسطات ديال المراقبة، والطريق لي كيدي ليها من أوسرد هو طريق ترابي كيسموه “بولرياح” قليلة فيه الحركة.
البارح وقعو هاد الإنفجارات بجوج وكيبان أن هاد المنطقة تقع فنفوذ المناطق لي قالو بأنه غادي تكون فيها “مناورات عسكرية” وهي المعلومة لي ما علناتش عليها القوات المسلحة الملكية المغربية ولا أكداتها بشكل رسمي او غير رسمي، يعني من الممكن أن سقوط هاد جوج قذائف يكون الغرض منو التشويش على هاد المناورات لي غادي تدار، خاصة وأن منطقة هاد المناورات اللي تسربات أخبارها من خلال كسابة ماشي ضمن المنطقة العازلة وهي ضمن السيادة الوطنية وتخضع ليها.
هاد النوع من الأعمال الإرهابية ما غاديش يدوز مرور الكرام والمغرب قادر يرد ولكن فالزمان والمكان المناسبين وحسب السياقات الدولية، وهاد السكوت لي كاين دابا هو لي خايفة منو البوليساريو لأنها تتوقع رد فعل كبير من المغرب.
