“حسين الجسمي” رَدْ على نظام العسكر غِيرْ بالفَنْ.. وُشارك مْع متابعيه فيديو ديال حُصُولُو عْلى وسام من درجة قائد من سيدنا..

الصحراء اليومية/العيون

دارت تصريحات الرئيس الجزائري، عبد المجيد تبون، حول الإمارات ضجة كبيرة فمنصات التواصل الاجتماعي، بسباب الحدة ديالها والاتهامات لأبوظبي بالضلوع فالأزمات اللي واقعة فالسودان وليبيا واليمن…

هاد التصريحات اللي انتاشرات بشكل واسع خلات رواد منصات التواصل الاجتماعي فالعالم العربي ينقاسمون ما بين مؤيد ومعارض ليها، ومن بين هاد الرواد كاين المغني الإماراتي حسين الجسمي اللي اختار يرد عليها بطريقة خاصة وغير مباشرة.

المغني الإماراتي حسين الجسمي ومن بعد التصريحات ديال عبد المجيد تبون اللي تفسرات بكونها تشير للإمارات، ناض وشارك مع متابعيه تغريدة فمنصة “إيكس” فيها فيديو قديم ديال حصوله على الوسام العلوي من درجة قائد من الملك محمد السادس، وفهاد ردة الفعل بغا يشير لقوة العلاقات بين أبوظبي والمغرب وفخره بهاد الوسام، وبغا يدق أيضا، على نظام العسكر ويحيلنا على دعمو للمغرب على حساب نظام العسكر.

الإمارات العربية المتحدة واحدة من الدول القريبة للمغرب والعكس صحيح وبجوجهم منخارطين فالدفاع عن وحدتهم الترابية وكيدعمو سيادتهم الوطنية، سواء ضد الجزائر اللي باغة تعطي الصحرا للبوليساريو أو إيران اللي محتلة ثلاث جزر إماراتية وهي طنب الكبرى وطنب الصغرى وأبو موسى، وهاد التقارب والدفاع المشترك بين البلدين مخلي الجزائر تحقد أكثر على الإمارات.