مَعْتامْدَ الأمم المتحدة حالة ديال التكتم بخصوص الزيارة اللي كيدير المبعوث الشخصي للأمين العام للأمم المتحدة لنزاع الصحراء، ستافان دي ميستورا للمنطقة.
ولحد اللحظة ما علقاتش الأمم المتحدة على هاد الزيارة وما تعاطاتش معاها لا من خلال بيان رسمي ولا من خلال الإحاطات اليومية اللي كيدير المتحدث الرسمي بإسم الأمين العام للأمم المتحدة، ستيفان دوجاريك.
ولليوم الثاني على التوالي تزامنا مع الزيارة اللي كيدير المبعوث الشخصي، ستافان دي ميستورا، لموريتانيا، التازمات الأمم المتحدة الصمت وما جبدش المتحدث الرسمي، ستيفان دوجاريك الموضوع، وما خبرش الإعلام بقضية هاد الزيارة المفاجئة وحيثياتها وعلاش جات فهاد الوقت؟ وواش غادي تشمل گاع الأطراف؟ ولا غادي تقتاصر غير على موريتانيا؟
هاد الصمت كتفسرو الأمم المتحدة على حساب تصريحات سابقة ديال دوجاريك بأنها كتعطي فرصة لدي ميستورا يخدم وبأنه كيفضل يخدم بصمت وهادشي ديجا بان حتى فزيارتو السابقة للعيون والداخلة والمنطقة، وفتصريح سابق ليه هو الوحيد قال أنه باغي يشتاغل فصمت وغادي يهدر فالوقت المناسب.
الصمت اللي معتامدو دي ميستورا وحتى الأمم المتحدة سيف ذو حدين فوقت كتحاول فيه البوليساريو توجيه وسائل الإعلام الدولية لاستقالة مرتقبة ليه، واخا زيارتو لموريتانيا جات باش تنفي هادشي، ولكن المهم الآن هو ضرورة إحاطة الرأي العام ووسائل الإعلام الدولية حول لقائه بوزير الدفاع الموريتاني بالذات وهو اللقاء الاول من نوعه مع مسؤول بحال هذا.
ومن جانب آخر، كاينة وجهة نظر كتقول بأن السكوت مرتابط بعدم وجود شي حاجة اللي ممكن تتگال على النزاع فهاد الوقت وعدم التوصل لصيغة باش يتم إطلاق العملية السياسية اللي تعد ضرورة مُلحة بالنسبة للأمم المتحدة وحتى أعضاء مجلس الأمن الدولي.
وكاينة أيضا، وجهة نظر أخرى كتقول بأن هاد السكوت مبني على تصور حاطو المبعوث الشخصي لآلية متفق عليها مع گاع أصحاب المصلحة باش يتم إطلاق العملية السياسية، واللي ممكن الموعد المحدد ليها هو شهر يونيو الجاي، وهاد السكوت جاي باش يخلي لدي ميستورا جو ملائم للخدمة بعيد على التشويش.
