وفد الاتحاد الأوروبي تلاقى والي العيون للي هدر ليهم على التنمية للي كتعرفها الأقاليم الجنوبية وكاع القطاعات لي هي رافعة هاد التنمية..

الصحراء اليومية/العيون

استقبل والي جهة العيون الساقية الحمراء، عبد السلام بكرات، صباح اليوم الاربعاء الموافق لتاريخ 13 دجنبر 2023، وفد الاتحاد الأوروبي لي جا للعيون وغادي يمشي للداخلة أيضا.

وهدر والي جهة العيون الساقية الحمراء، خلال اللقاء ديالو بالوفد لي من ضمنو تقنيين من الاتحاد الجمركي للاتحاد الأوروبي (European Union Customs Union)‏ لي معروف اختصارا بـ EUCU، على الوضع فجهة العيون الساقية الحمراء، والتنمية لي كتقودها المملكة المغربية فأقاليمها الجنوبية.

والي جهة العيون الساقية الحمراء قدم للوفد نبذة على جهة العيون والأوراش لي فيها ولي كتشمل گاع القطاعات ومناحي الحياة، خاصة الصيد البحري والفلاحة ولي كيتعتابرو رافعة لهاد التنمية التي تشهدها الأقاليم الجنوبية للمملكة، ولي هي تنمية قائمة على الارتقاء بوضعية الإنسان والاستثمار فيه، ومبنية أيضا، على عوائد الاتفاقيات التجارية لي موقعة بين المغرب والاتحاد الأوروبي فإطار تكريسو لوحدته الترابية.

وأكد عبد السلام بكرات، خلال اللقاء، على أن الأقاليم الجنوبية للمملكة كتبقى مفتوحة أمام كل الوفود لي بغات تجي تزورها وتشوف فين وصل هاد التقدم فالأقاليم الجنوبية بقيادة الملك محمد السادس.

هاد النوع ديال الزيارات مزيان وكيعزز وحدتنا الترابية وكيعطي لمختلف الوفود الأجنبية فكرة حقيقية مبنية على معاينات على شنو واقع فالمنطقة والجهود لي كدير المملكة المغربية فأرضها بلا ما تلتافت على الآخر ولا أطروحتو لي عامرة بالأوهام والمغالطات.

وهاد الزيارات أيضا، كتعطي فكرة لمختلف الشركاء الاستراتيجيين للمغرب وخاصة الاتحاد الأوروبي على أهمية ونوعية التقدم المحرز فالصحرا خاصة فالعيون بناء على هاد الشراكات التجارية والاقتصادية لي العوائد ديالها يتم استثمارها فخلق تنمية سوسيو اقتصادية خلات الأقاليم الجنوبية نموذج فأفريقيا.